CANGAS NON SE VENDE
FORO SOCIAL POLA DEFENSA DO POBO
XXX
Á PRESIDENTA E AO CONSELLO DE ADMINISTRACIÓN DA AUTORIDADE PORTUARIA DE VIGO
Praza da Estrela 1
36201 VIGO
En nome propio e como representante do Foro Social de Cangas, COMPAREZO E EXPOÑO:
Vostede debe pensar nunha inxenuidade ilimitada da poboación e que temos que comungar coas rodas de muíño das súas declaracións en prensa, saídas de vostede ou do seu eficiente equipo asesor .
Sácase da chisteira a invención de que o Parlamento de Galicia realizou unha investigación sobre o tema Massó cando iso é absolutamente falso. O único que houbo no Parlamento foi o recoñecemento de irregularidades por parte da conselleira de Política Territorial en sesión do 10 de outubro de 2005, e a promesa de solicitar explicacións á Consellería de Pesca, á de Medio Ambiente, e analizar entre os servizos xurídicos da autoridade portuaria e os da consellería de Política Territorial o proceso de adxudicación. Os resultados desa xestións xamais foron expostos publicamente, e menos no Parlamento.
Con referencia aos traballos sobre o Plan de Usos (lembremos que o Porto de Vigo é o único dos 28 portos do estado que non o ten, cando é obrigatorio dende o ano 1992), vostede afirma que non permitirá nin un novo recheo, cando xa licitou a primeira fase (52.974 m2) da ampliación do Areal, por suposto, sen o suporte de ningún Plan de Usos.
Afirma que o proxecto de plan de usos do PSOE tiña 40.000 m2 de recheos con 25.000 en Rede Natura. A realidade é que eran 200.352 m2 , 32.881 dos cales eran en Rede Natura, e, polo que parece, vostede está seguindo ao pé da letra ese esquema, sen o Plan aprobado e substituíndo -iso si- o plan Nouvel por unha fonte luminosa que suporía o malgasto de case 3 millóns de euros e a perda dun importante espazo portuario.
Lembrarlle tamén que o Plan de Usos entra de cheo no ámbito de aplicación da lei 9/2006, de avaliación dos efectos de plans e programas no medio ambiente, transposición da Directiva Europea 2001/42/CE, e que deberá poñer en marcha a traveso do Ministerio de Medio Ambiente o proceso de avaliación ambiental estratéxica que integre os aspectos medioambientais no proceso de deseño do Plan. Se tanto quere actuar coa lei na man, que non pretenda rematar primeiro o plan e reducir a súa avaliación ambiental a un mero formalismo.
Polo que se refire á concesión dunha posible prórroga temporal ao prazo de remate das obras de Marina Atlántica, lembrarlle que a concesión que lle foi outorgada a esta empresa é ilegal polas seguintes razóns:
As concesións outorgadas a Massó Hermanos S.A. por OOMM de 17/03/1930, 03/08/1935 e 24/05/1939, non se atopaban entre os bens adxudicados aos ex-traballadores de Massó por auto do Xulgado do Social de 02/02/1998, e polo tanto non puideron ser transmitidas dos ex-traballadores a Conservas e Frigoríficos do Morrazo S.A. como pretenderon facer as Resolucións do Consello de Administración da Autoridade Portuaria de 23/02/2001 e 28/06/2002.
A Autoridade Portuaria de Vigo non advertiu ao Xulgado do Social da ilegalidade que supuña o embargo e adxudicación das concesións outorgadas por OOMM 25/06/1943 e 30/04/1943, por ser estas bens pertencentes ao dominio público e polo tanto ser inembargables, inalienables e imprescritibles.
O concurso convocado por Resolución do Consello de Administración da Autoridade Portuaria de 29/12/2003 para selección dunha oferta para o outorgamento de concesión para porto deportivo, non puido ser convocado por non estar aínda en vigor a lei 47/2003 e por non ter a Autoridade Portuaria a súa disposición nin os terreos no mar, pertencentes por Autorización de 17/10/1972 á Confraría de Cangas, nin os de terra, por estar vixentes as concesións outorgadas a Massó Hermanos S.A.
O proxecto eufemisticamente denominado “Remodelación e adecuación ambiental das instalacións portuarias da Factoría Massó para usos náutico-recreativos” é ilegal por non ter a adecuada cobertura urbanística, ao non estar aprobados os preceptivos Plan de Usos e Plan Especial do Porto de Vigo no termo municipal de Cangas. As recentes sentenzas do Tribunal Supremo o están a confirmar.
Este proxecto é tamén contraditorio coa cualificación da zona de Cabo Balea como Espazo Natural Barra, Cabo Home, do Rexistro Xeral de Espazos naturais de Galicia.
A empresa Residencial Marina Atlántica S.A. mantén no Rexistro de Propiedade 16.992 m2 de dominio público portuario, sobre os que ten responsabilidade a Autoridade Portuaria de Vigo, inscritos en pleno dominio e libres de cargas, incorrendo en usurpación flagrante de dominio público.
Por estas razóns e por outras que sería moi prolixo detallar lle recomendaríamos que estudase e se asesorara adecuadamente sobre a conveniencia de que vostede asine unha posible prórroga ás obras que está a realizar Residencial Marina Atlántica S.A.; pola nosa parte, lle podemos asegurar que faremos todo o posible por conseguir que os que burlen a lei en detrimento do ben común sexan castigados polo sistema xudicial.
O concesionario tamén está a incumprir varias das disposicións presentes no outorgamento da concesión:
Incumprimento da obtención das licencias urbanísticas esixibles
Incumprimento das condicións derivadas da declaración de impacto ambiental:
Incumprimento da premisa de que os áridos aportados procederan dunha canteira cercana debidamente autorizada
Incumprimento de que o porcentaxe de finos nos áridos fora practicamente desprezable
Incumprimento da compensación aos titulares de autorizacións para faenar na zona
Incumprimento da presentación dun plan de xestión viaria para o tráfico de camións
Aproveitamos a ocasión para lembrarlle o estado de absoluto abandono e perigo para os usuarios no que se atopan a maior parte das instalacións portuarias dependentes da Autoridade Portuaria que preside en Cangas, e lle desexamos un feliz e moi duradeiro paso pola presidencia de tan impoluta, prestixiosa e respectada administración.
Axuntamos Cd con documentación do seu interese.
En Cangas, a 6 de novembro de 2009.